清朝顺治十六年，太仓城里厢有家大户人家做寿，请了太仓所有格有身价人家来吃寿酒。吴梅村祖浪搭大户有点姻亲，所以也请伊来吃寿酒。伊本想勿去，夫人看伊整日闷勒书房里，格样下去要生大毛病格，就劝伊到城里走走，好散散心。

 

　　这日，吴梅村着一件蓝青布格长衫，黑布马褂，是个道地格乡下小户人家穿着。勿认得伊格人，总当是三家村里格冬烘老夫子。再说，吴梅村名气虽大，真正认得伊格人倒勿多。因为伊平素勿喜欢同常人交往，至多与同窗知己，谈文论艺。明亡以后，一直在乡下读书写诗，在太仓可称是勿露庐山真面目。

 

　　这次吃寿酒，伊正好坐勒搭一些有地位人格旁边。同桌上格七位仁兄，并勿认得吴梅村，只当伊是东家格一个远亲教书先生，根本勿把伊放在眼里。

 

　　酒过三巡后，格七位仁兄，想夸耀自己格地位身份，其中一个讲：“伲趁酒兴，不妨大家谈谈平生最得意格三趟吃酒，以助雅兴。”六位仁兄听了，当然一致赞成。伊就接下去讲：“鄙人平生得意格三趟酒是：娶了知县令嫒千金是一趟；家中大花园完工大请客又是一趟；跟随岳父大人到苏州与二位县令同饮又是一趟。”这时另一位白面书生敬了大家一杯，讲：“区区最得意格三趟酒是：乡试前三名受老师执壶筛酒；回太仓受合县贤达敬酒；格次能向六位仁兄大人领教，也算得上生平最得意了。”伊自以为是格桌上文才谁也比勿上伊了，非常得意。接着又一个老头立起来敬各人一杯，讲：“小老最得意格是：一次小老与六位长老一起到清帅大帐议和（事实上去投降清朝），大受款待；二次是苏州戴知府请客，小老有幸，就坐在戴知府旁侧；再一次是太仓乡人为伲小老造生祠。”接下来是一个比一个吹嘘得更加不知廉耻，到七位仁兄大人都吹完，伊搭就看格个乡下土老头，对吴梅村讲：“勿知老先生阿有啥个可以讲了。”事实上是取笑伊。吴梅村原想装糊涂勿去理伊搭，偏偏伊搭缠住勿放，一定要出出伊丑。吴梅村想想：对这些未见过世面格乡绅，只有吹得更大才能叫伊服帖。伊就整了整衣衫，讲：“吾生平也曾吃过三次最得意格酒：一次是先朝殿试第二，先帝赐酒一杯；一次是教太子读书，先帝再赐酒一杯；一次是国初辞官回乡，当今顺治帝赐酒一杯。”七位仁兄一听，舌头都大了，伊搭去一打听，原来伊就是大名鼎鼎格吴梅村。